Na aasmaan ko yoon sar kasheedah hona tha

Huzoor-e-khaak-e-Madinah khameedah hona tha

 Agar gulon ko khizaan naa raseedah hona tha

Kinaar-e-khaar-e-Madinah dameedah hona tha

 Huzoor un key khilaaf-e-adab thi betaabi

Meri umeed tujhe aar meedah hona tha

 Nazarah khaak-e-Madinah ka aur teri aankh

Na is qadar bhi qamar shaukh deedah hona tha

 Kinaar-e-khaak-e-Madinah mein rahatein milti

Dil-e-hazeen tujhe ashk chakeedah hona tha

 Panaah-e- daaman-e-dasht-e-Haram mein chain aata

Na sabr-e-dil ko ghazaal-e-rameedah hona tha

 Ye kaise khulta key unke siwa shafee nahin

Abath na auron key aage tapeedah hona tha

 Hilaal kaise na banta key maah-e-kaamil ko

Salaam-e-abroo-e-Shah mein khameedah hona tha

 La amla anna jahannam tha wa-dah-e-azali

Na munkiron ka abath bad aqeedah hona tha

 Naseem kyoon na shameem un ki Taiba sey laati

Ke subh-e-gul ko girebaan dareedah hona tha

 Tapakta rang-e-junoon ishq-e-Shah me har gul sey

Rag-e-bahaar ko nishtar raseedah hona tha

 Baja tha arsh pe khaak-e-mazaar-e-paak ko naaz

Ke tujh sa arsh nashin aafreedah hona tha

 Guzarte jaan sey ek shor-e-Yaa Habeeb key saath

Fughaan ko naala-e-halq bureedah hona tha

 Mere kareem gunah zeher hay magar aakhir

Koi to shahed-e-shafa at chasheedah hona tha

 Jo sang-e-dar pe jabeen saaiyon mein tha mitna

To meri jaan sharaar-e-jaheedah hona tha

 Teri quba key na kyoon neeche neeche daaman hon

Ke khaaksaaro sey yaan kab kasheedah hona tha

 RAZA jo dil ko banana tha jalwah gaah-e-Habeeb

Tu pyaare qaid-e-khudi say raheedah hona tha