Paat wo kuch dhaar ye kuch zaar ham

Yaa Ilaahi kyoon kar utrein paar ham

 Kis bala ki mai sey hain sarshaar ham

Din dhala hote nahin hushiyaar ham

 tum karam sey mushtari har aib key

Jins-e-na maqbool har baazar ham

 Dushmanon ki aankh mein bhi phool tum

Doston ki bhi nazar mein khaar ham

 Laghzish-e-paa ka Sahara ek tum

Girne waale laakhon na hinjaar ham

 Sadqa apne baazuon ka almadad

Raise torein ye bute pindaar ham

 Dam qadam ki khair aay jaan-e-maseeh

Dar pe laaye hain dil-e-beemar ham

 Apni rehmat ki taraf dekhein Huzoor

Jaante hain jaise hain badkaar ham

 Apne mehmaano ka sadqa ek boond

Mar mitey pyaase idhar Sarkaar ham

 Apne koocha sey nikaala to na do

Hain to had bhar key khudai khwaar ham

 Haath utha kar ek tukra aay Kareem

Hain sakhi key maal mein haqdaar ham

 Chaandni chatki hay unke noor ki

Aao dekhein sair-e-toor-o-naar ham

 Himmat aay za-af unke dar par gir key hoon

Be takalluf saaya-e-deewar ham

 Ba ataa tum shah tum mukhtaar tum

Be nawa ham zaar ham naa chaar ham

 tum ne to laakhon ko jaanein pher deen

Aisa kitna rakhte hain aazaar ham

 Apni sattaari ka Yaa Rab waasta

Hoon na ruswa bar sar-e-darbaar ham

 Itni arz-e-aakhri keh do koi

Naaw tooti aa paray manjhdaar ham

 Munh bhi dekha hay kisi key afw ka

Dekh ow isiyaan nahin be yaar ham

 Main nisaar aisa musalmaan kijiye

Tor daalein nafs ka zunnaar ham

 Kab sey phailaye hay daaman tegh-e-ishq

Ab to paayein zakhm daaman daar ham

 Sunniyat sey khatke sab ki aankh mein

Phool ho kar ban gaye kya khaar ham

 Naatawani ka bhala ho ban gayay

Naqsh-e-paaye talibaan-e-yaar ham

 Dil key tukre nazr-e-haazir laaye hain

Aye sagaan-e-koocha-e-dildaar ham

 Qismat-e-soor-o-hiraa ki hirs hay

Chahte hay dil mein gehra ghaar ham

 Chashm pooshi-o-karam shaan-e-shumaa

Kaar-e-maa be baaki-o-israar ham

 Fasl gul sabzah saba masti shabaab

Chorein kis dil sey dar-e-khumaar ham

 Maikadah chut-ta hay lillah saaqiya

Ab key saaghar sey na hon hushiyaar ham

 Saaqi-e-tasneem jab tak aa na jayein

Aye siyah masti na hon hushiyaar ham

 Naazishein karte hain aapas mein malak

Hain ghulaamaan-e-shahe abraar ham

 Lutf az khoo raftagi Yaa Rab naseeb

Hon shaheed-e-jalwa-e- raftaar ham

 Un key aage dawa-e-hasti RAZA

Kya bake jaata hay ye har baar ham